碧科「夫添」拉頭馬

猪拉多纳

「碧科」尋日贏馬，以呢匹馬英文名Big Four，字面解釋就已經講咗係劉志傑、李漢堅、羅厚煒與盧華勝四位馬主合夥擁有，而中文馬名更索性以英文同音命名，所以呢場頭馬對佢哋就真係特別有意義。其實響幾位馬主之中，劉志傑同羅厚煒過往曾經一齊養過隻「多奇妙」，可惜成績麻麻地，未贏過就已經退役，今次就搵埋李漢堅同盧華勝兩位老友一齊做馬主，結果呢個名副其實嘅Big Four組合擦出火花，不過落飛黨亦好有眼光，今場着綠格四倍得手補中。
       
碧科四位馬主到齊，「夫添」報捷。

據劉志堅講，呢匹馬係由佢哋親自入貨，然後交畀鄭俊偉訓練，而練者睇過呢匹馬之後，亦有唔錯嘅評價，熱完一場身，今次加番個頭罩，表現即刻唔同晒。四位馬主就認為愛駒彼邦兩歲就贏千四米，血統肯定愈跑愈長，雖然今場贏直路賽，擺明就係恃質兼早熟取勝，而佢哋仲有一個心願，就係希望「碧科」能夠進軍來屆打吡為終極目標。