里昂有火主場做大「蘇」

猪拉多纳

里昂今晚會喺歐聯外圍賽附加賽首回合，主場迎戰皇家蘇斯達，雖然兩軍喺所屬聯賽都唔算超級豪門，但都同樣擁有高效率嘅士哥好手，絕對有力夾手夾腳做番場入球騷娛樂球迷，必捧2.15倍入球大！

（有線64及203周三凌晨2:45直播）
皇蘇士哥拿開咧響頭炮

喺芸芸財政緊絀嘅西甲球會中，皇家蘇斯達唔使變賣主力「填數」之餘，仲可以由費倫天拿以超值價260萬歐元買入新前鋒施費洛域，實在「叻豬」！皇蘇喺西甲開咧戰，正係由施費洛域同埋上季踢到着晒火嘅卡路士韋拿齊齊入波打開勝利之門，今場仲好可能有上仗做後備留力嘅基沙文復任正選，入球能力毋庸置疑。

里昂作為法甲老牌球隊，論星味雖然唔及同聯賽嘅巴黎聖日耳門及摩納哥，但火力仍然勁有睇頭，踢咗兩場法甲已經炮製咗7個入球，其中拿卡錫迪兩戰入3粒，哥古夫亦連續兩場有進帳，加上有主場之利，當然要開火好好「招呼」訪客皇蘇啦！