歷基韋亞後防穿窿 恆大開殺戒「讓主」筍

猪拉多纳

廣州恆大（足智彩譯FC廣州）今晚將會喺亞冠盃8強首回合主場迎戰卡塔爾勁旅歷基韋亞，喺上屆賽事8強止步嘅廣州聲言「從哪裏跌倒就從哪裏爬起」，小妹深信以呢支超級豪門嘅實力同鬥心，絕對可以喺主場先拔頭籌，痛擊傷兵滿營嘅歷基韋亞，一於直取1.73倍「讓主」啦！（now671台、中央5台及廣東體育周三晚8:00直播）
射手艾傑臣着晒火

論實力，現今嘅FC廣州比上季喺亞冠盃8強出局時可以話更強，雖然走咗個巴里奧斯，但係今季初來投嘅前維多利亞射手艾傑臣更加「好使」，佢喺20輪中超賽事已經喪入20球，難怪畀對手歷基韋亞嘅教練格列特大讚係最強球員啦！至於另一主力前鋒孔卡亦都連續4場有進帳，而且穆里奇目前仍以8球領先亞冠神射手榜，FC廣州靠住呢條鋒線，要喺依然保持全季不敗嘅主場炒起歷基韋亞唔係難事。

歷基韋亞主帥格列特一早講明目標只係守和，不過佢哋喺賽前傳出壞消息，正選右閘穆沙因傷唔會披甲，令防線大打折扣，踢開左邊嘅廣州射手穆里奇自然有機可乘啦！況且翼鋒迪亞受傷後暫未全面復操，未必踢得，客軍今鋪對住廣州睇怕要吞蛋收場喇。