萬能Key亨利弗爆捧紅牛「大」

猪拉多纳

紐約紅牛聽朝將會喺美職作客西雅圖海灣者，紅牛前鋒亨利憑住型爆慶祝動作「Henrying」紅遍全球，今場肯定率領一班兄弟，同以火力強見稱嘅西岸勁旅海灣者「大」戰一場，當然捧1.88倍入球大啦！

（開賽時間：周一早上9:00）

講到近日嘅球壇網絡紅人，肯定非紐約紅牛前鋒亨利莫屬啦！事關呢位前阿仙奴及巴塞球星，早排對侯斯頓戴拿模同FC達拉斯入波之後，都挨住門柱擺出型爆「甫士」慶祝，呢個動作畀紅牛粉絲改名「Henrying」之外，仲被一眾「Photoshop達人」大改特改，由托住比薩斜塔到捏住「叛徒」尹佩斯條頸都有！又難怪亨利咁招積，佢近3場一共入咗兩球，帶挈紅牛4連勝之餘更暫列東岸火力最強嘅球隊，拍住卡希爾同艾斯賓杜拿呢啲具實力嘅射手，今場整番幾粒唔係難事。
海灣者連續11場有波入

不過坐鎮主場嘅海灣者亦都唔好惹，佢哋近6戰獲得5勝1和之餘，艾迪莊遜同尼亞高更包辦咗8個入球入面嘅6個，鋒線喺佢哋領導之下，海灣者已經連續11場有波入，今次對住紅牛，實有一番惡鬥！