侯城猛虎出柙咬維拉

猪拉多纳

德甲球隊喺歐聯威到盡，單從拜仁作客都能擊潰英超富豪球會曼城已見兩地水準差距，若單計賽事整體水平，其實德甲已有超越英超之勢，但由於宣傳力度唔夠對手，所以英超仍然係亞洲最受歡迎嘅聯賽。英超透明度高，而且被譽為公信力第一聯賽，深受莊家及菠菜人士歡迎，就算賽事水平稍跌，短期內地位都唔會受到動搖。

英超今季亂過亂世佳人，前列曼市雙雄都脫腳，當中「紅魔鬼」更有嚴重下滑迹象，爭標形勢極不明朗，唔少行家都抱觀望態度，部分人就認為經歷多年錦標荒嘅阿仙奴今季有機會突圍而出。
「老虎」今季主場未輸過

英超下游亦亂到暈，「老虎」侯城本被視為降班熱門，但呢班波愈踢愈好，暫時仲係三支升班球隊中排名最高，令唔少菠菜業界人士跌晒眼鏡，睇個勢仲有得贏。

呢隻老虎仔本身人腳麻麻，冇乜大星撐住班波，但佢哋踢落絕對唔曳，尤其主場係威係勢，開季至今保持不敗之身，相當硬淨，甚有主場王本色。加上由於班波名氣唔大，今輪對阿士東維拉都係小讓平半，趁對手幾個主力有傷唔齊腳，佢哋有機會再贏多場，呢隻上盤博得過！

（now 624周六晚10時直播）