紅魔搏殺求翻「新」

猪拉多纳

朗尼復出拍尹佩斯

今季英超第一個打爛飯碗嘅領隊，就係新特蘭嘅迪肯尼奧，家陣「黑貓」暫時由奇雲波爾接管，無論士氣同臨場應變能力仲衰過舊時，今晚佢哋主場迎戰曼聯，想保住不敗難過登天，一於捧曼聯客W。
新特蘭開季1和5負

新特蘭開季成績差到冇人有，6場聯賽只得1和5負包緊艇，不過空穴來風未必無因，睇番佢哋比賽嗰陣嘅表現，其實真係1分都畀多佢哋，事關成隊波踢到無神無氣，鋒線球員連似樣啲嘅射門都冇，條防線就仲衰，自從賣走門神米洛列特畀紅軍之後，「黑貓」6場聯賽就合共失咗14球咁多，依家仲連正式領隊都冇，仲點可能期望佢哋會有起色呀？
曼聯眾星只欠1場勝仗

另邊廂，作客嘅曼聯今季衞冕路都幾難行，開季成績麻麻，6場聯賽只得2勝1和3負，係曼聯自1989至90球季後，最差嘅開季成績，不過咁，數番曼聯對上一次聯賽3連敗，已經係96/97球季嘅事，斷估「魔頭」莫耶斯點都會諗計，唔想連續衰3鋪平紀錄啩？睇埋紅魔周中歐聯作客薩克達執番1分，算係有多少起色，練波受傷嘅朗尼據報今仗可以復出，有佢同尹佩斯拍住上，鋒力當然有保證啦！

查實計曼聯人腳，實在唔應該咁水皮，正所謂「長路有盡時」，只要曼聯可以贏番場漂亮勝仗，班球員嘅信心自不然返晒嚟，回復昔水日嘅水準，計人腳同狀態，曼聯都贏新特蘭成條街，紅魔想一鋪翻身，今晚係時候啦！