「3狼」發惡追咬諾士郡

猪拉多纳

英錦標第2圈今晚有好場次多選擇，狼隊主場對諾士郡不妨再追主W。雖然上季狼隊慘情降班，但落到英甲總算能夠踢番起信心，加上高層已表明唔會出售翼鋒巴卡利沙高，意味「3狼」能夠繼續數胡，1.54倍主勝熱都要得過！

（開賽時間：周三凌晨2:45）
諾士郡失球係狼隊3倍

自從季初喺英聯盃出局，狼隊就表現得勁生猛，對上10場有8勝1和1負，當中「3狼」奇雲杜里、利治格菲斯同巴卡利沙高最醒神，夾埋攻入14球。原本諾定咸森林打算先借後買巴卡利沙高，諗住搵佢爭升班，不過狼隊嫌森林出手低一口正式拒絕，即係話「3狼」會繼續咬對手。

對家諾士郡近5戰得2勝3負，而且射手舒胡美同後衞希頓賀尼斯仲養緊傷，領隊基禾耶之前仲親口承認，唔知可以留隊留到幾時，有心理準備隨時被炒魷魚，試問咁嘅情況，諾士郡又點同狼隊鬥呀？唔好忘記，家陣諾士郡喺聯賽嘅失球數字（19球）係狼隊（6球）3倍有多喎！