弗爆高士路旗開得「聖」

猪拉多纳

國際賽期間繼續有巴甲畀大家玩，高士路聽朝喺主場對聖保羅，繼續追1.5倍主W最好。最近高士路贏到開巷，可以話聯賽冠軍在望，相反聖保羅射手路爾斯法比安奴同甘素霉到連巴西國家隊都嫌棄，仲要連作為精神領袖嘅隊長兼門將羅渣里奧都停賽，咪亂捧！

（開賽時間：周四早上8:50）
聖保羅孖寶冇料到

巴甲最近展開馬拉松式地獄快車賽程，但高士路完全冇受影響咁，自從喺8月尾嘅巴西盃出局，近10場聯賽有9勝1負，即使中場巴迪斯達復出冇耐又傷出，依然旺到勒唔住。雖則高士路今場仲有中堅達迪安達臣為巴西國家隊服役缺陣，但佢哋領先第2位嘅甘美奧11分，笑住踢發揮都好啲啦！

對家聖保羅只係距離降班區域1分，鬼咩，路爾斯法比安奴唔對辦，日前喺主場3:2險勝維多利亞，佢至叫做結束入球荒。而且甘素完全冇料到，記得効力山度士期間，佢曾經同尼馬被捧成巴西新希望，點知依家冇人理，呢兩位大哥連巴西國家隊都唔肯用，撞啱40歲門神羅渣里奧停賽好擇使。