櫻花教頭唔想撈冷敲勝利船

猪拉多纳

日皇盃第3圈今日有「阪神打吡戰」上演，由排日職前列嘅大阪櫻花喺主場對日乙「一哥」神戶勝利船。論實力，當然係櫻花高啲，弊在新王牌柿谷曜一朗去咗為日本國家隊比賽，教練古爾比又話教埋今季唔撈，士氣受挫要唔過，扒冷博3.5倍客W。

（開賽時間：周日中午12:00）
新星小川慶治朗腳風順

日皇盃冠軍可以踢下屆亞冠盃，櫻花心態上當然唔會放軟手腳，問題係射手柿谷曜一朗同中場山口螢被日本國家隊徵召，黑木聖仁又傷埋，實力大打折扣，就算櫻花近10場有5勝5和，都唔值得盲目追捧，特別係佢哋嘅教練古爾比覺得今季戰績普通，認為要負責任決定辭職下季唔玩喎！

勝利船降班後有唔少主力離隊，但最近已經騎番住大阪飛腳，重返聯賽榜第1位，佢哋嘅新星小川慶治朗，上星期更攻入個人今季第14個聯賽入球，即使球隊最終以1:2不敵千葉市原，6勝1和走勢斷纜，睇落依然有足夠實力同櫻花鬥過，爆得出唔奇。