紅軍打鵲祝賀 「神奇隊長」10周年

猪拉多纳

利物浦誓要用贏波嚟慶祝謝拉特做紅軍「神奇隊長」十周年紀念！今晚英超早場紐卡素主場對利物浦，係謝拉特做紅軍隊長整整第十年，球隊上下爭勝心特別強，而且紐卡素頂唔住「2S」蘇亞雷斯同史杜列治，上盤可取。

（now 621周六晚7時45分直播）

2003年10月15日，謝拉特首次以紅軍隊長身份帶領球隊出戰歐霸盃前身歐洲足協盃，對斯洛文尼亞球隊盧布查拿，結果輕鬆炒對方三比○，「謝四」做喼頓至今足足十年，係紅軍史上任期最長嘅隊長。當時領隊侯利亞決定用年僅23歲嘅謝拉特取代希比亞做隊長令到唔少人感到震驚，但事實證明佢係天生嘅領袖，多次射入世界波拯救球隊，亦帶領紅軍贏得歐聯冠軍。
謝拉特衝百球里程碑

利物浦官方網頁特別炮製專題，可見謝拉特幾咁德高望重。季前連麻煩友蘇亞雷斯都畀佢說服而繼續留隊，球迷先有機會見到佢同「史獨」史杜列治呢對「2S」組合，今晚作客聖占士公園球場咁有紀念性，加上謝拉特累積英超入球已九十九球，紅軍球員實會一條心，以勝利獻畀呢位「神奇隊長」，「2S」會繼續攻到紐卡素有氣冇碇抖。

紐卡素方面，「喜鵲」雖然上場英超贏咗卡迪夫城，但對上一場主場就輸咗畀升班球隊侯城，可見呢隊波狀態幾咁飄忽，而且佢哋近四場英超都有失波，踢咗七場聯賽失十二球，防守唔掂，點頂得住紅軍一對又扭得又射得嘅前鋒呢？