熱刺強襲舒列夫

猪拉多纳

人滿之患二線兵搶韁

今晚歐霸K組第三輪賽事，榜首嘅熱刺作客摩爾多瓦球隊舒列夫。由於今季熱刺人腳鼎盛，令好多實力派如迪科爾及迪比利咁都少咗正選機會，因此佢哋喺歐霸有得上陣分外搶韁，面對實力輸幾條街嘅舒列夫，又係騷哥利嘅好機會，1.82倍讓球客勝咪錯過。

（有線61及201台周五凌晨1時直播）

熱刺今夏用出售加里夫巴利嘅錢，買咗蘇爾達杜、荷西保連奴、伊天卡普爾及基斯甸艾歷臣等猛將，令球隊出現人滿之患，領隊保亞斯順得哥情失嫂意，惟有喺聯賽同盃賽分兩批人應戰。好彩咁樣反而激發起球員嘅鬥志，好似小將賀治比原本冇碇企淪為雞肋，但呢位德國中場並冇hea踢，喺之前嘅英聯盃及歐霸屢有佳作，用行動證明自己係掂嘅，因此保帥近期用番佢喺聯賽打正選。
主隊未贏過難登大雅之堂

正正有賀治比嘅成功案例，令其他邊緣人都躍躍欲試，例如迪科爾咁，依家保帥將佢定為聯賽後備、盃賽主力，不過迪科爾喺有限嘅出場時間交足貨，之前三場盃賽轟入五粒，成為陣中首席射手，比起貴價貨前鋒蘇爾達杜仲多兩粒。

摩爾多瓦球隊舒列夫只屬山寨王，頭兩場歐霸對住特林素同安治都和波收場，實力平平難登大雅之堂，今仗仲有主力美利坐波監，好難頂得住磨刀霍霍嘅一眾熱刺好手，讓球客勝捧得過。