華倫「加」把勁踢好波

猪拉多纳

地鐵增班次Fans逼爆球場

歐霸盃今晚激戰連場，A組嘅西班牙華倫西亞喺主場恭候瑞士聖加倫，當地嘅地鐵公司特別增加列車班次接載Fans去米斯泰拿球場睇波，預期今仗實座無虛席，門將古亞達賽前亦保證球迷會開開心心返屋企，睇嚟連續兩輪聯賽失分嘅「蝙蝠兵團」已下定決心做番齣好戲，呢場波捧2.02倍「讓球主勝」。

（有線64及203周五凌晨3:05直播）
「蝙蝠兵」聯賽失威球迷照撐

華倫西亞最近喺聯賽連環失分畀畢爾包同皇家蘇斯達，不過班球迷依然好支持隊波，截至前日為止，今場已經賣咗近8成波飛，當地嘅地鐵公司尋日亦宣布，增加前往米斯泰拿球場嘅沿線班次，咁多Fans撐，唔踢番場好波點對得住球迷！門將古亞達就話，已經研究過對手聖加倫嘅比賽影片，保證今場可以攞晒3分令班Fans開開心心返屋企喎！
聖加倫攻守都唔掂

查實古亞達咁囂又無他嘅，畢竟聖加倫連本土聯賽嘅表現都唔見得人，11場聯賽入得11球，上輪聯賽仲淨吞巴素利3蛋添，攻、守兩瓣都信唔過。華倫雖然有杜蘭柏邦扭傷右腳足踝，不過因為發燒缺操嘅中場班尼加已經病愈，有佢鎮守中場，簡拿利斯可以專心餵波畀前線嘅普斯迪加同莊拿斯干卡維斯，聖加倫後防肯定有得震冇得瞓。