墨爾本勝利大騷賀教頭

猪拉多纳

普斯迪高路接掌澳洲隊

呢個星期澳洲足壇最大新聞，就係澳洲足總委任墨爾本勝利教練普斯迪高路做新任國家隊主帥，五年合約嚟喎！普斯迪高路就一啲都唔輕鬆，依家距離下年世界盃只係得八個月，「袋鼠國」踢成點就睇佢呢幾個月嘅功力喇！其實普斯迪高路之前都帶過澳洲踢世少盃同世青盃，國際賽經驗唔差o架，而佢亦係近年少數教大國腳嘅土炮主帥，球迷對佢自然就更加期待！

普斯迪高路將會為國家隊及球會兩邊走，依家當然顧住球會先啦！今日佢會帶領墨爾本勝利出戰布里斯班獅吼，為球隊爭取今季澳職首場「勝利」而努力。勝利今季踢咗場好波，就係上仗作客阿德萊德聯，喺劣勢下連入兩球追和，就係因為佢哋唔放棄嘅態度令球員士氣大振。正路計勝利無論近態同實力其實都難以同獅吼相比，但普斯迪高路曾經教過獅吼，點都算係知己知彼！今場普斯迪高路相信會派巴巴路西斯呢位同樣踢過獅吼嘅球員攻堅，又係熟晒路，有力爭取入球。
獅吼火力唔嘢小

獅吼自八月起友賽連埋正式賽事已連贏七場，而且場場有波入添！上星期佢哋對FC悉尼嘅狂風掃落葉，相信大家睇直播時都已經見識到。雖然射手貝利沙今仗因傷缺陣，但一班攻擊主力好似布萊治同軒歷基安達迪等火力都好猛o架！正路梗係估獅吼贏波，但勝利上輪半場反彈，佢哋依家嘅士氣、信心同狀態雖然唔知仲維唔維持到，不過有主場之利都唔可以睇小！所以與其估估下，不如寄望雙方合演場入球騷好過啦！

（有線64台周五下午4時30分直播）