法比仔撐行 阿仙奴出氣

猪拉多纳

「我愛阿仙奴﹗」法比加斯向一手一腳揍大佢嘅舊東家作出深情表白，又話想重返阿仙奴做教練，更睇好新核奧斯爾可以幫球隊奪取英超冠軍，呢位前隊長咁睇好隊波，阿仙奴班球員更要用勝仗嚟證明佢哋係有實力贏到冠軍，今仗適逢對住處於無帥狀態嘅水晶宮，捧「讓球客勝」啱數。
水晶宮態沉無帥難招架

阿仙奴上場歐聯慘遭「黃蜂尾後針」，輸畀多蒙特1比2，而且「賠了夫人又折兵」，韋舒亞今仗因傷上陣成疑，但領隊雲格根本唔使愁，因為阿仙奴中場仍然係人才濟濟，奧斯爾、辛迪卡索拉、艾朗藍斯、路斯基等，個個都傳射皆能，總之就係傳畀狀態托弗嘅基奧特入又得，自己射亦得，得咗﹗今仗難得對住正處谷底嘅水晶宮，阿仙奴仲唔「趁你病攞你命」，搵水晶宮嚟出氣？水晶宮現時排喺聯賽榜尾二，近五場全敗，而且全部都係輸兩球或以上，領隊荷路維甚有自知之明，選擇同水晶宮和平分手，但正所謂「軍不可一日無帥」，水晶宮今仗即使係主場出擊都係無得打。