主帥高普續約至2018

猪拉多纳

蜜蜂兵送賀禮「主勝」益大「加」

多蒙特近季分別攞到聯賽錦標同德國盃冠軍，上季更殺入歐聯決賽，主帥高普可謂功不可沒。唔少人都擔心呢位教練會畀其他豪門搶走，不過一眾「蜜蜂兵」同球迷都可以放心喇，事關高普前日同球會續約延長合約至2018年。今晚多蒙特喺主場迎戰史特加，一於支持「蜜蜂兵團」大勝一場，為高普送上賀禮，撐1.58倍「讓主」。

（有線61、201及廣東體育周六凌晨3:30直播）
史特加難靠伊比斯域發圍

多蒙特主帥高普一向深得球員歡心，今次佢成功同「蜜蜂兵」續約，成班球員落到場梗係識做。呢班波今場有隊長基爾傷愈復出，加上今仗同時係門將維丹費拿第300次喺德甲上陣，肯定想力保清白之身，咁多利好消息，相信都有助佢哋今場波大勝慶祝。以佢哋最近作客連贏阿仙奴同史浩克04嘅佳態，今仗回師主場肯定殺無赦。

至於對手史特加有前鋒卡卡奧受傷缺陣，前線會由伊比斯域孭飛，賽前高普都講明會針對性部署Mark實佢，相信呢位波斯尼亞射手好難搵到食。再加上史特加連續3場比賽都喺領先優勢下畀對手追平，防線漏洞甚多。今次對住火力十足嘅多蒙特，連環犯錯吞幾隻蛋真係一啲都唔出奇。