阿仙奴無利可圖

猪拉多纳

地獄賽程+11月魔咒

是日英超尾場上演前列對決，阿仙奴主場迎擊利物浦，「兵工廠」地獄賽程頭場先不敵車路士，依家仲要面對十一月魔咒，全軍將帥開始感受到無形壓力，佢哋今戰缺少硬淨防中法米尼做髒活，頂唔住利物浦弗爆嘅「SAS」進攻組合，今場推介「讓球客勝」！

（now 621周日凌晨1時30分直播）

阿仙奴上場喺聯賽盃決戰車路士，正式展開地獄賽程，教頭雲格做足準備，上場盃仔對車仔安排宮市亮及賓特拿等後備兵攻堅，最終輸波出局。雲帥咁做冇錯，只怪箭頭禾確特、普多斯基及阿歷士張伯倫等主力要養傷，球隊後備兵力亦唔及對手。

「兵工廠」喺聯賽獨佔一哥地位，但唔代表贏硬，特別係球隊缺少防中法米尼，影響都幾大。法米尼今季回歸阿仙奴之時，蘇豪有份笑雲帥度縮數唔肯使錢買人，不過，呢位「巴打」演活無名英雄角色，喺防線前面專心做掃蕩工作，辦得妥妥當當，今戰無論用阿迪達或艾朗藍斯頂檔，相信都無法發揮相同作用。
紅軍2S着晒火

利物浦「SAS」蘇亞雷斯（Suarez）及史杜列治（Sturridge）進攻組合處於火紅狀態，球隊近四戰入十二球，兩位哥仔合共貢獻十粒，另外兩球係神奇隊長謝拉特射入十二碼，顯示近期「紅軍」生波士哥全出自「2S」，唔到你唔服！「大S」蘇亞雷斯上場連中三元踢到曉飛，「小S」史杜列治把握力高，作客都唔赦對手！
領隊Chit Chat

羅渣士（利物浦）：菲臘比古天奴已經完全冇事喇，今仗隨時候命，球隊會帶住信心同鬥志去比賽，希望得到完美嘅賽果。

雲格（阿仙奴）：球隊狀態係有少少唔好，所以今仗對住利物浦一定要踢番場好波，同人講我哋係掂嘅﹗