艾拉豪言曼聯要連贏十場

猪拉多纳

唔知係咪踏入萬聖節前後，全城「鬼」氣沖天，連帶令曼聯都從谷底反彈，呢隻紅魔鬼唔經唔覺連埋盃賽已經取得三連勝。
富咸陷低潮唔夠揪

不過隊長艾拉認為咁樣係未夠：「想攞冠軍就要再穩定啲，唔可以贏完一場之後又打和或輸波，依家我哋係取得連勝，但只有連贏十場，我先至會話曼聯已經重上正軌，甚至贏得肉酸啲都冇所謂。」認真豪氣。

其實難怪艾拉咁口響，因為曼聯幾大前鋒朗尼、尹佩斯同查維亞靴南迪斯輪流發威，小將贊奴沙不時有神來之筆，最重要係昔日喺逆境下屢創奇迹嘅紅魔精神已經返晒嚟。相反，佢哋今仗作客嘅對手富咸陷於低潮，周中英聯盃喺尾段失守輸畀英冠仔李斯特城，失威兼打擊士氣，仲傷埋哥倫比亞射手洛達列加，後防又冇埋穩如磐石嘅軒治蘭特，實畀一班紅魔鬼恰死，客勝捧得過。