最佳第12人「小豌豆」

猪拉多纳

筆者最近透過講英格蘭聯賽盃曼聯對諾域治嘅賽事，又一次見到高效前鋒「小豌豆」查維亞靴南迪斯嘅表現，佢嘅運動細胞爆棚，之前試過360度扭盡條頸頂入士哥，喺聯賽盃為曼聯奠定勝局嗰粒入波亦見功架，除咗門前捕位叻，仲要壓住對手高點頭槌攻門，跟手再彈起身補中，真係唔簡單！
高效前鋒 勁過蘇B

「小豌豆」仲好年輕，其實佢比曼聯之前嘅冷殺手蘇斯克查更加犀利，全因EQ高，比賽態度好，即使常常坐後備，喺重要賽事又冇得踢，但都從未有過半句怨言。呢個孩子臉射手亦冇埋怨隊友，或者黑口黑面，就算正選上陣被換出時都係乖乖坐返後備席，未試過發牢騷，並無超級巨星令人難以接受嘅態度，作為一個球員，佢嘅品格極之祟高。

查維亞靴南迪斯不時畀人批評代表墨西哥踢國際賽表現唔及為曼聯上陣咁好，相信係因為墨西哥踢法迂迴，太着重地面短傳，而曼聯不時有機會打突擊，加上有朗尼及尹佩斯等大牌球員遮蔭，對手未必防到呢個竄擾力極強嘅球員。「小豌豆」一落場就算得十零分鐘都成日有波入，好似將即食麵擺入微波爐即刻有料到，若計逐分鐘表現，佢相信係「紅魔鬼」曼聯最高效、最具侵略性嘅攻擊球員。

籃球場上有最佳第6人，棒球有擅於「閂閘」嘅最佳後備投手，喺現今足球世界，我認為稱呼「小豌豆」為最佳第12人都不為過，呢類大後備喺好多教頭心目中有舉足輕重嘅地位，唔好睇小佢哋啊！