英幼獅贏卡士 搶「芬」話咁易

猪拉多纳

摩利臣 沙夏誓演身價

U21歐國盃外圍賽今晚戰火重燃，A組不敗之「獅」英格蘭會喺米爾頓凱恩斯嘅MK球場恭候芬蘭。「幼獅」前線雙星拉夫摩利臣同韋費特沙夏，一個想躋身大國腳行列，一個就想證明實力，兩大鋒將各有所求，今仗實搵芬蘭祭旗，一於捧1.45倍「讓主」。

（now621台周五凌晨3:45直播）
修夫基上任未輸過

自從修夫基上任之後，英U21喺歐國盃外圍賽4戰錄3勝1和，家陣揸住10分排喺A組榜首，今晚鬥同組排第3嘅芬蘭，雖然有隊長韋斯頓停賽，中場列特文同湯卡路爾又齊齊因傷落選，不過有份獲徵召嘅李斯特城悍將李安摩亞、打比郡中場韋曉士同黑池翼鋒湯馬士恩斯統統都係英冠一線新星，「卡士」同戰鬥力點秤都贏芬蘭幾條街。

最重要係陣中鋒將拉夫摩利臣呢排喺英超光芒四射，近期亦都吹緊佢會躋身大國腳行列，呢位韋斯咸新Icon為咗向英格蘭主帥鶴臣「騷哥利」，試問又點會唔搏命先？佢嘅前線拍檔韋費特沙夏喺曼聯坐多過踢，條氣肯定頂住頂住，難得有機會喺國際賽舞台證身價，話畀「紅魔」領隊莫耶斯知佢唔識貨，今鋪肯定搵芬蘭出氣。
芬蘭領隊呻鋒力不足

對家芬蘭有主力射手普贊柏路因傷落選，領隊拿列加倫賽前狂呻鋒力不足好難同英U21鍊，加上佢哋上輪外圍賽對住實力麻麻嘅摩爾多瓦都要輸0:1，實力去到邊大家有眼見，造訪「幼獅」想輸少球都難！
歐U21 A組