荷蘭雙翼「細」破日本

猪拉多纳

如果荷蘭、日本踢埋同一家波，結果係點係人都估到——日本香咗九成。所以今日荷蘭同日本响比利時嘅中立場亨克拍跳，荷蘭個1.46倍主W比較抵博，但係呢啲友誼波往往唔會激烈過練波幾多，1.95倍入球細一樣抵玩。

（有線61、64、201及203周六晚8:15直播）
東瀛兵班門弄斧玩側擊

今場波兩隊都擺明試陣，日本早就爆響口打「3-4-3」，仲會安排香川真司、本田圭佑玩雙翼齊飛，只不過係右腳嘅香川打左邊，本田就放喺右路。但係連內田篤人自己都認，荷蘭最勁就係兩條邊路，快速反擊尤其煞食，日本想用埋同一家波對付「橙軍」，簡直就班門弄斧。

無可否認，荷蘭唔算出足人，尹佩斯傷咗，龍門用新仔施利臣，但係佢哋仲有洛賓、雲達華治呢啲猛人，長友佑都賽前雖然咬牙切齒，話自己一定嘜得掂洛賓，不過09年9月佢响另一場友賽就畀洛賓搞殘咗，嗰場波荷蘭數咗日本仔3蛋。仲有，表面睇大家响亨克交手，雙方都冇地利，喺比甲搵食嘅川島永嗣，仲話自己有主場出擊嘅感覺添。但係荷蘭係比利時鄰國，「橙軍」今次作客坐一程大巴就到，荷蘭班人對比利時嘅環境，點都熟過日本兵，若果計有冇主場之利，日本仲蝕底就真。