日本再做入球騷「比」你睇

猪拉多纳

出年嘅世盃決賽周，相信好多人都想睇吓「紅魔鬼」比利時嘅真正實力，依家唔少人都認為佢哋極有機會打破傳統勁旅嘅壟斷，今晚佢哋喺主場迎戰精銳盡出嘅日本，大家可以先「睇一睇辦」，買定包花生等睇入球騷啦！

（有線61及201周三凌晨4:00直播）

比利時近年人才輩出，依家唔單止話正選陣容星光熠熠，連23人名單都爭到頭崩額裂，好似効力卡利亞里嘅尼恩高蘭咁，事隔接近一年先再獲重召，佢仲公開講明要爭取表現去踢世盃決賽周，但係奇雲迪布尼、迪比利同超新星薩卡利亞巴卡利又點會輕易讓位先？家陣有機會騷身價，今晚肯定唔會留力。

日本教頭沙哲朗尼每次有比賽，都會Call齊班主力，以完整陣容出擊，兩件星級中場香川真司同本田圭佑會拍住上，其中香川仔近排喺曼聯已經有番正選，狀態肯定好過10月國際賽嗰陣，不過日本向來都係攻強守弱，繼早兩日同荷蘭踢成2:2後，今晚又有望同比利時合演入球騷！
頂占筍盤：比利時（入球大）