羅馬場爛冇地「利」可言

猪拉多纳

連場大雨加埋撻大爛地，相信係扒冷最佳時機，講緊邊場波？之唔係今晚羅馬主場鬥卡利亞里場意甲獨腳戲囉！羅馬已經連續3日落大雨，奧林匹高球場尋日仲舉行咗場欖球賽事添，唔爛就有鬼啦，對主張地面推進嘅羅馬實有好大影響，適逢卡利亞里回勇，2.95倍「讓客」博得過吖！

（TVB301台周二凌晨3:45直播）
托迪養傷難鬥卡利亞里

查實今場波睇衰羅馬，除咗話奧林匹高球場嘅草地情況唔理想之外，仲因為佢哋近況跌Watt。經歷開季10連勝之後，「雌狼」最近連續失分畀拖連奴同薩斯索羅，隊長托迪養緊傷，加埋迪斯度仲未重拾狀態，羅馬嘅火力確係幾令人擔憂。

雖然話卡利亞里同羅馬嘅實力有一段距離，但佢哋上仗擊敗拖連奴終止3連敗頹勢，對士氣唔多唔少有一定幫助。最重要係呢支薩丁島球隊近年係咁剋住羅馬，雙方近6次交手，卡利亞里贏足4次，對上兩次造訪奧林匹高更加贏晒添，相信喺近兩仗入3球嘅丹尼爾干迪領銜鋒線下，今鋪有望偷到雞，受讓抵玩。