富咸反彈維拉有難

猪拉多纳

新帥上任谷起Hea碧

據英國《鏡報》日前報道，有研究顯示為護級而苦苦掙扎嘅英超球隊喺換領隊後通常都對搶分有正面影響，雖然呢個研究結果暫時未能喺剛換領隊嘅富咸身上證明到，上場佢哋不敵熱刺1比2，但其實球隊表現漸見起色，今仗主場對住疲兵阿士東維拉，一於捧富咸贏波反彈！

（now 621周日晚9時30分直播）
有擺脫頹勢迹象

聯賽輸到跌落降班區域嘅富咸搵嚟前曼聯助教梅倫史甸頂替祖爾做主帥，喺新帥入主嘅刺擊下，一班富咸球員表現落力，上仗主場即使對住星光熠熠嘅熱刺一啲都唔驚，更由前鋒迪查加先開紀錄，搞到熱刺陷於苦戰，最尾輸波失分只能慨嘆可惜，但呢場波顯示富咸有擺脫頹勢嘅迹象。而且梅倫史甸更曾同隊中王牌貝碧托夫喺曼聯合作過，一向畀人話係「Hea碧」嘅貝碧托夫見佢上任即刻唔hea，交出一個靚助攻畀迪查加輕鬆射入，富咸有呢位具質素射手翻生，再加上隊友回復鬥志，有力贏維拉攞番3分，暫時脫離降班區。

阿士東維拉兩日前作客完修咸頓，出盡九牛二虎之力先取得勝仗，今仗又再飛去倫敦大鬥富咸，苦戰90分鐘再加舟車勞頓，成班球員出現疲態實屬正常，今仗對富咸冇甜頭可言，主勝捧得過﹗