黑貓留力護級難擋車路士

猪拉多纳

今個月初先打過嘅新特蘭同車路士聽日凌晨又再喺英格蘭聯賽盃8強碰頭，車路士陣容強大，今晚作客進行輪換都冇問題，相反新特蘭要為聯賽護級而努力，唔會喺盃賽搏命，呢場一於簡簡單單捧客勝。

（TVB 301周三凌晨3時45分直播）
藍軍兵力足副選都掂

車路士上場英超對水晶宮贏得一啲都唔輕鬆，一班球員搏到盡先可以保住2比1勝局，再加上球隊下場要作客阿仙奴爭榜首，領隊莫連奴今場一定會玩輪換，畀一班上場冇得踢正選嘅球員如舒賀爾尼、伊度奧、林柏特、艾殊利高爾、奧斯卡杜斯山度士、奇雲迪布尼等出陣，睇番呢班所謂「副選」，實力同樣超班，其實佢哋喺莫連奴嘅帶領下根本冇分正選同後備，所以擁有咁強兵力嘅車路士今晚要贏一啲都唔難。

自普耶接手新特蘭後，「黑貓」表現漸有起色，喺月頭輸畀車路士3比4一仗表現一啲都唔失禮，逼到車仔陷於苦戰，上場對韋斯咸嘅護級大戰若非欠運，已可全取三分，可見成班「黑貓」球員為護級而奮力戰鬥，但今場英聯盃佢哋正因為有護級呢個後顧之憂而唔會搏命，相信普耶都會識分輕重，留力踢三日後英超主場對諾域治嘅搶分戰好過，車路士今場客勝穩陣！