鳳凰受讓下盤博得過

猪拉多纳

水手「靈魂出竅」射手啞火

今日下晝有場澳職獨腳戲，由中岸水手同威靈頓鳳凰交鋒，牌面睇落係水手高啲，不過佢哋個靈魂人物麥堅治準備跟舊Boss離隊搵食，另一鋒將麥比連又跌晒Watt，睇落唔似會讓得起變陣出擊嘅鳳凰，鳳凰受讓半一寧博下盤。

（有線64及203周四下午4:30直播）
傳麥堅治跟舊Boss過檔

呢場本身係第6輪聯賽，但由於雙方有唔少新西蘭國腳，當時為遷就新西蘭國家隊踢世盃附加賽而改期。先講吓水手，首先係教練艾萊特早排已經過檔仙台維加泰，盛傳水手中場Keyman麥堅治都即將以外借身份跟埋恩師去日本搵食，今場未必會披甲，對班波攻擊力相信影響唔細。佢哋上輪聯賽淨吞阿德萊德聯4蛋，係新帥莫斯上任後首場敗仗，最弊係上季首席射手麥比連開咧至今入得1球，係水手今季戰績大倒退嘅主因。

雖然話對家鳳凰個頭開得仲衰，9輪聯賽過後都仲未開齋，不過教練梅歷克痛定思痛決定變陣出擊，前鋒泰拿保特及中場貝圖斯都會擔正，兩位副選兵為取悅教練肯定搏盡，加埋好波之人靴南迪斯亦已經傷愈復操，今鋪鬥水手絕對有得鍊。