「一哥」獅吼炮轟噴射機

猪拉多纳

呢三、兩年好多朋友都去咗參加「工作假期計劃」(Working Holiday Scheme)，而妹頭就成日都倒轉──Holiday Working（假期工作）！其中一位朋友啱啱喺澳洲返嚟，自不然相約出嚟吹吹風，問吓澳洲咩環境，睇吓係咪真係咁爽啦！

呢位朋友就話澳洲最多唔係袋鼠、樹熊，最多反而係烏蠅喎，仲要係趕都趕唔走嗰啲！妹頭淨係聽到已經嚇到頭暈，如果啲球員擘大口跑步、隻烏蠅飛咗入口點算……哎呀！都係唔好諗嘞！

呢幾日香港凍到震，但澳洲就係Amazing Summer，絕對無寒冷天氣影響發揮。澳職榜首嘅布里斯班獅吼近期贏完又贏，喺積分榜已經開始拋離其他球隊。嘩，個勢咁強，妹頭當然繼續追佢主勝啦！

獅吼今季踢咗四場主場全部贏晒，防守都好密不透風，咁多場只係失咗一球畀西悉尼流浪者，實在太勁喇，今日佢哋仲係夫添上陣！另外，佢哋今季表現出色嘅小將卡華美耶保亞畀德甲慕遜加柏睇中，獅吼都大方放人，畀呢個後生仔出去見吓世面，咁對澳洲足球都係件好事。
噴射機士氣曳難作惡

紐卡素噴射機雖然早前連場報捷，但個勢就畀上周對西悉尼流浪者時打窒咗。噴射機上星期雖然有主場之利，但無論落後畀西流前同後都係無力反擊，仲愈踢愈沉，睇嚟點都打擊咗士氣。呢隊波太過後生，要有老大哥壓場，但係布歷捷斯經已冇貨賣，希斯基又有傷在身！唉，咁搞法，今場要作客榜首嘅獅吼，試問邊有勝算可言！

（有線64及203台周五下午5時直播）