卡城炒主帥士氣曳吼半場和

猪拉多纳

今晚英超尾場由「紅龍」卡迪夫城主場硬撼「黑貓」新特蘭。卡迪夫城主帥馬基麥基同老闆陳志遠不和終於被炒魷，對陣中士氣造成打擊，包尾「黑貓」雖搶分心切，但作客一定穩陣行先，佢哋近排興玩半場和，對住冇火「紅龍」不妨追多鋪。

（now 621周日凌晨1時30分直播）

將帥不和乃兵家大忌，之前卡迪夫城主帥馬基麥基想喺冬季轉會窗買人嘅言論，得罪咗老闆陳志遠，雖然馬帥獲得大批球迷支持，但雙方始終面和心不和，隨着球隊前晚主場0比2慘敗畀修咸頓，陳志遠終於到機會正式炒馬基麥基魷魚。睇番卡城近七仗聯賽入得4粒咁大把，仲只係贏過比佢哋更曳嘅西布朗，「紅龍」已經冇晒季初嗰團火。
新特蘭作客睇定嚟踢

當然，淪落榜尾嘅新特蘭亦唔好得幾多，不過中途上任嘅領隊普耶，勝在有自知之明，無論對邊隊都會先做好防守謀定後動，初段大玩拉布，避免太早失波打亂部署，呢種保守戰術，造就佢哋經常喺上半場同對手拉成均勢，近7場有5場開出半場和，就算作客態沉嘅卡迪夫城，相信普帥唔會冒進，呢場悶鬥悶格局，斯維認為半場和值得再追。