曼城超班有「力」大勝

猪拉多纳

唔少球迷都希望愛隊獲財團垂青提出收購，之後大事增兵爭冠軍，但查實收購到未必好，好似今晚喺英格蘭足總盃第3圈咁，就由兩支先後被亞洲財團先後入主嘅球會對碰，布力般喺主場恭候曼城。曼城最近贏到唔識停，對住沉淪英冠嘅布力般，唔難大捷，捧1.65倍「讓客」。

（now621、633及660台周六晚8:45直播）
英冠布力般專心爭升班

曼城畀中東財團收購後豪買球星，最終贏得英總同英超冠軍，可謂「靠錢升呢」嘅代表。佢哋最近喺「聖誕快車」攞足12分，足見呢班波狀態大勇，今仗肯定乘勝追擊。中場核心大衞施華復出領軍，加上盃賽殺手迪斯高專恰弱隊，呢位射手今季喺英聯盃對住英冠嘅李斯特城、韋根合共轟入3球，睇嚟今晚又係時候發惡。

布力般喺2010年被印度財團收購後冇大手買人之餘，仲搞到隊波降班收場。家陣布力般喺英冠同排第6嘅葉士域治相差2分，升班先係佢哋首要目標，而且具英超經驗嘅中場艾度曉同門將羅賓遜仲未好番，點頂住來勢洶洶嘅曼城？