森林當勇越級扑「錘」

猪拉多纳

今晚英格蘭足總盃第3圈（64強）早場，英冠嘅諾定咸森林主場硬撼英超分子韋斯咸，唔好以為強弱懸殊冇得踢呀，森林喺多名英超失意軍人輪流發威下非常Sharp醒，相反「錘仔幫」依家深陷護級漩渦，邊有心情爭盃仔呀？加上隊長路蘭停賽實力受削，森林越級挑戰竟要讓平半兼低水，證明連莊家都睇好佢哋，梗係撐上盤喇。

（now 621、633及660周日晚8時直播）
半隊缺陣 「錘仔幫」頭痕

曾喺07年協助弱旅打比郡衝上英超嘅領隊比利戴維斯，如今帶領排第5嘅森林有機會複製神奇，一班英超失意軍人，如前布力般射手達比舒利、前新特蘭肥仔嘜中場安祖列特、前西布朗箭頭西蒙確斯，加埋兵工廠出產嘅小將蘭斯貝利，喺比帥糅合之下逐漸成形，近7場英冠未輸過氣勢如虹。相反，韋斯咸狀態沉到爆，近3仗英超喺領先之下被追和或反勝，士氣大受打擊之餘，聯賽已經跌到落尾二，領隊艾拿戴斯嘅帥位岌岌可危，依家護級大過天，放棄足總盃絕不出奇。

「錘仔幫」撞正隊長路蘭上仗作客富咸因向對手報復而領紅，要坐4場波監，加上占士哥連斯、湯堅斯、拉夫摩利臣及華斯迪等全部傷晒，「錘仔幫」可謂冇Heart冇力，難怪莊家開出森林讓平半喇，呢個上盤非常值博。