巴塞半場大趕熄基

猪拉多纳

速食私房菜迎周日榜首戰

今晚西班牙盃16強首回合戲碼，巴塞隆拿喺主場迎戰基達菲。睇番巴塞嚟緊周日凌晨聯賽要作客二哥馬體會，主帥馬天奴今仗明顯唔願浪費太多氣力影響榜首大戰喇，面對「私房菜」基達菲希望盡快鎖定勝局，上半場入兩粒冇難度，斯維力撐半場大。

（now 632周四清晨5時直播）

依家巴塞雖然話就話係西甲一哥，但其實同馬體會只係同分，冇乜優勢可言，由於聯賽係計對賽成績定排名，嚟緊周日凌晨佢哋作客「床單兵團」誰勝誰負，隨時喺聯賽錦標上起關鍵作用，主帥馬天奴必定以呢場榜首大戰行先，因此今仗梗係想上半場入多粒，盡早解決基達菲，去到下半場就可以hea住踢甚至換走主力休息。
基達菲遇剋星冇運行

加上呢場對手基達菲係巴塞「私房菜」，不但近四次作客魯營全敗，歇冬前主場對住巴塞喺兩球領先下，半場就畀「地上最強」反先，最終輸夠2比5，前鋒柏度洛迪古斯正係該仗上半場大演帽子戲法嘅反勝英雄。

隨住今季有尼馬強勢加盟，及馬帥愛將阿歷斯山齊士全面復甦，令柏度淪為第四前鋒，地位尷尬，上仗聯賽對艾爾切雖有一球進帳，但屢失良機為人詬病，難得今仗大有機會續踢正選，相信佢一開波就搶韁博士哥氹馬帥，上半場要製造兩個入波唔難，半場大有買趁早。