巴塞Hea鬥基達菲吼細盤

猪拉多纳

Lead住4粒 二線兵擔正

巴塞隆拿今晚深夜西班牙盃十六強次回合作客基達菲，巴塞首回合淨勝四粒，美斯傷愈復出尾段連省兩球，家陣基本上入硬八強。美斯剛與尼馬、沙維等巴打飛完去瑞士出席國際足協金球獎頒獎禮，眾星於本周二先齊齊復操，相信今仗唔使勞煩佢哋上戰場，預期會搵二線兵擔大旗，難炒多鋪，入球大細中位數改成3.5球，捧細盤！

（now 632周五清晨5時直播）

巴塞上場榜首大戰悶和馬德里體育會，小將沙治羅拔圖有份落場感受大戰氣氛，佢係巴塞重點栽培嘅對象，被視為中場大腦沙維接班人，但佢強調自己只係新仔，能分擔沙維部分工作已經好開心，又幾謙虛噃。
「南韓美斯」卡塔爾放光芒

沙治羅拔圖今戰勢擔大旗，另一巴塞青訓產品基斯甸泰路等都有機會落場，班波控球力仍然好強，但埋門一腳肯定冇班師兄咁醒，欠缺大勝本錢。基達菲近五次對巴塞狂失廿三球，為免又出醜，一定專心守，博細盤正路！

近日卡塔爾有個國際Ｕ16邀請賽打得如火如荼，巴塞隆拿派出「南韓美斯」李勝宇出戰，呢個小朋友年僅十六歲，過波同分波甚具功架，略嫌埋門一腳把握力麻麻，但已經好叻仔，假以時日必成大器。

呢個賽事巴塞Ｕ16對住巴黎聖日耳門同柏雷素爾等球隊場場打真軍，拳拳到肉，講真呢啲未來之星賽事分分鐘好睇過呢場幾成例行公事嘅西班牙盃囉！