洛達勝在爛打唔赦阿爾

猪拉多纳

今日受注賽事以盃賽做主打，阿King睇中一場荷蘭盃八強洛達主場鬥阿爾克馬爾。洛達今屆喺荷蘭盃先後淘汰燕豪芬、維迪斯出局，而且球隊上場聯賽喺新帥湯馬臣領軍下踢出頑強鬥志，主場唔怕阿爾克馬爾，讓球主勝可作過關重心。

（周三凌晨3時45分開賽）

兩軍上周末喺歇冬後首場荷甲都有唔錯表現，阿爾克馬爾主場以3比0輕取NAC，洛達作客海倫芬則喺兩度落後下逼和對手，首次正式領軍嘅新帥、前丹麥國腳湯馬臣睇嚟有料到。洛達現時喺荷甲雖然排名16要踢護級戰，不過出戰荷蘭盃表現卻分外醒神，對上兩圈先後擊敗燕豪芬、維迪斯兩支實力分子，相反阿爾克馬爾之前贏嘅都係荷乙球隊，上圈面對甲組嘅海倫芬即要踢至互射12碼先晉級，作客冇必勝把握。
扒冷撐牛津聯「+1」

另外，英格蘭足總盃第3圈（64強）重賽，英冠查爾頓作客鬥英乙牛津聯。查爾頓近六場作客不勝，最近一次作客贏波已經係去年11月，而且佢哋目前聯賽陷入降班漩渦，盃賽未必太上心，牛津聯有力爆冷，捧讓球主勝。最後法足盃32強，馬賽主場鬥尼斯。尼斯上周中於另一盃賽法聯盃8強和南特合演入球騷，最後以3比4飲恨。馬賽上場聯賽因場地問題改期，養精蓄銳相信會有唔少入波出現，捧大盤。