愛華頓乘人之危-1偷芬

猪拉多纳

「利市細佬」愛華頓今晚作客對英甲嘅史提芬納治，雖然主隊近季喺足總盃時有佳作，但今次越級挑戰仍被睇淡，皆因呢班波深陷降班危機，根本冇本錢分心喺盃賽搏殺。「拖肥糖」級數贏晒，相信有力輕鬆大勝晉級，捧讓球客勝！

（now 621及635周日凌晨1時30分直播）
史提芬納治護級要緊

足總盃一向係爆冷溫床，史提芬納治近年一再製造冷門賽果，經常上演以弱勝強好戲。史提芬納治季初喺聯賽盃作客愛華頓逼到對手踢加時，如非已轉投曼聯嘅費蘭尼建奇功，邊隊晉級都好難講！不過，今時唔同往日，史提芬納治現時身處英甲榜尾，護級形勢危急，即使有心爭盃，都係無力爆冷。

愛華頓有料教頭馬天尼斯唔敢輕視對手，明白盃賽場合主隊會較有利。「拖肥糖」現有唔少傷兵，守將艾卡拉斯、史密斯高文、中場巴克里、吉遜、箭頭迪路菲奧同干尼都唔踢得，但點秤都係高過對手，吸收上次聯賽盃苦戰至險勝嘅經驗，肯定會認真對付史提芬納治，作客都會大炒對手！