般粉通宵紮營買飛

猪拉多纳

般尼茅夫難得抽中對勁旅，今場大戰自然引嚟大批球迷瘋狂搶飛啦！大批「般粉」上周五已經喺售票處外紮營，等翌日門票開放預售，所有波飛喺3個鐘內極速沽清，唔少捱凍排隊嘅球迷都失望而回。
3粒鐘沽清 炒高20倍

般尼茅夫將呢場賽事嘅公開發售門票，安排上周六喺電話、網上系統及兩處門市銷售，英國《伯恩茅斯回聲報》報道指，唔少球迷早喺上周五晚已經去到球場售票處外排隊，排第一嘅Winwood父子特登由夜晚7點開始紮營駐守，相當誇張，但順利買到飛嘅佢哋仍然話非常值得！

至於另一門市伯恩茅斯亦出現超長人龍，搞到唔少粉絲即使早喺開售當日朝早6點去到，最終都係買唔到飛，兩個售票點共有千多名球迷空手而回；至於電話及網上系統未開售已經因為太多人使用而出現故障，所有門票喺開賣後3個鐘全部沽清，至於180個冇人認投嘅季票位置其後亦喺15分鐘內賣晒。有球迷發現有「黃牛黨」將原價22鎊嘅門票，以超過20倍嘅500鎊轉讓，食水勁深！