聖誕後未贏過波登地聯頹爆難言「聖」

猪拉多纳

登地聯自從蘇超聖誕快車後，就一直沉淪不起，連續6場聯賽不勝。現時排第5嘅佢哋喺今晚蘇超主場鬥聖莊士東，以登地聯近況咁頹嚟睇，想一報上次作客輸3蛋之仇怕且幾難，冷吼聖莊士東3.4倍客W啦！

（TVB301台周二凌晨3:45直播）
聖莊士東有蘇超神射手壓陣

登地聯上次贏波，已經係上個月21號嘅事，當時佢哋主場贏羅斯郡1:0。嗰陣佢哋連埋蘇格蘭足總盃，仲係威係勢咁連贏5場添，誰不知快車一到呢班波即時跌晒Watt，連續6場不勝！早排腹部有傷嘅悍將麥克威爾遜，上輪聯賽已經可以喺後備席候命，今場上陣應唔成問題，但佢啱啱先好番，狀態可能未去到最Top，而且射手施夫斯都仲未傷好，9成9繼續掛免戰牌，火力大打折扣，登地聯仲憑咩復仇先？

對家聖莊士東雖然都有幾名傷兵，但係射手史堤夫美爾近排3場入4球咁鬼弗，家陣仲霸住個射手榜一哥位添，有呢位蘇格蘭國腳壓陣，聖莊士東鋒力相當靠得住，今鋪隨時爆冷贏埋都唔奇！