利物浦默郡打吡攞威

猪拉多纳

英超尾場上演默西賽德郡打吡戰，利物浦主場決戰愛華頓，「紅軍」僅領先死敵一分，呢場四哥之爭唔衰得，佢哋個「3S」進攻組合無堅不摧，近期輪到射手史杜列治着晒火，愛華頓難抗敵軍高速進襲，今場一於捧利物浦主Ｗ！

（now 621周三凌晨4時直播）

今季英超四哥席位爭奪激烈，四至第八位只有七分之差，利物浦暫時第四，但優勢唔多。「紅軍」最強武器係「3S」進攻組合，王牌前鋒蘇亞雷斯超高產，幫隊友鋪橋搭路一樣掂，上仗足總盃對般尼茅夫就包辦兩個助攻！史杜列治復出後連續三場有士哥，腳風超順，仲有進步神速唔會淨係亂爆嘅史達寧，佢哋速度、技術同射術兼備，都唔知顧得邊個。

利物浦有唔少傷兵，最大影響係缺少防中盧卡斯，隊長謝拉特要打後一格做防務，今季謝老四狀態麻麻，最大鑊係成日誤傳送禮，好在拍檔佐敦軒達臣愈踢愈好，可以幫謝拉特做啲「髒活」。後防方面，兩閘格連莊臣及荷西安歷基，連同中堅丹尼爾艾格仍然養緊傷，今仗左路隨時起用法拿根。
愛華頓傷患嚴重

愛華頓擊敗韋斯咸借得科特迪瓦長人中鋒拉仙拿查奧爾，前線多個人用，但大軍傷兵問題都幾嚴重，出擊右閘史密斯高文唔踢得，中場重心巴克里仲要抖，上場又有白賴仁奧維度恐怖斷腳，戰鬥力削弱唔少，唔夠「紅軍」打啦！