巴塞半場發到維

猪拉多纳

西盃擒皇蘇及時回勇

今晚西甲重頭戲，由巴塞隆拿作客硬撼西維爾。巴塞上輪聯賽輸得肉酸，令佢哋跌一級做阿二，好彩上周中盃賽贏番場，仲連續9年締造單季總入波達百球嘅壯舉，適逢西維爾傷兵滿營，巴塞隨時嚟一招快刀斬亂麻，半場客勝捧得過。

（now 632周一凌晨4時直播）

巴塞上場聯賽大意輸畀華倫西亞，唔單止今季主場不敗金身被破，更遭馬體會搶咗個一哥位，為爭標今仗不容再失，好彩喺上周中西盃4強首回合以2比0輕取皇家蘇斯達，及時回勇之餘，亦令佢哋今季各項賽事嘅總入球達到100球，連續9年締造單季達100個士哥嘅紀錄，認真犀利。雖然球王美斯傷愈後未回復托弗狀態，但變身助攻王一樣Sharp醒，隊友阿歷斯山齊士、柏度洛迪古斯、法比加斯亦非常生性，各自有雙位數入波，況且今仗有後衞馬斯真蘭奴及佐迪艾巴坐波監，索性以攻代守反客為主。
西維爾天殘地缺

西維爾歇冬後5仗僅1勝，近兩仗接連遭對手反勝，成班守將嚴重跌Watt，今仗不但有右閘安度查停賽，仲有中堅丹尼爾卡列高及中場馬高馬連有傷在身上陣成疑，攻守都唔掂。何況巴塞喺聯賽甚少連衰兩鑊，為咗爭標戰意十足，仲唔趁住西維爾病到七彩，拿拿臨鎖定勝局咩，半場客勝有1.88倍咪嫌少。