噴射機鬥鳳凰等開大

猪拉多纳

前日啱啱經過投X站，見到人頭湧湧，莫非XX彩又有多寶？原來係直播緊澳職！妹頭見仲有時間，就喺投X站「微服出巡」，原來真係唔親身經歷都唔信，現場無論係阿哥或阿叔都好投入，氣氛唔差得過現場，尤其一到埋門，大家啲反應真係操兵都冇咁齊，各位如果覺得一個人睇波悶悶哋，真係可以去投X站一齊熱鬧吓。今午就有場紐卡素噴射機主場對威靈頓鳳凰，以噴射機近期長期失波嘅「強勁」走勢，加上客軍嘅光頭前鋒侯斯甘斯繼續大爆發，點都撐入球大！
侯斯甘斯泰加特鬥入波

雖然呢兩隊波賽前只係排第八、九位，但其實由第四打落到第九噴射機，相差都只係幾分，爭入季後賽競爭激烈！有目標在前，所以都唔敢批死近態一般嘅噴射機處於下風。噴射機上場逼和西流，表現有好轉，阿當泰加特更打破入球荒，相信士氣信心會有改善，今日主場出擊，冇理由唔放手狂攻。當然噴射機最近3場連失8球，防守的確好差，鳳凰嘅靴南迪斯、堅尼根寧咸同侯斯甘斯真係多謝都嚟唔切講就入波。總之兩隊分別擁有以八球並列射手榜首位嘅侯斯甘斯同阿當泰加特，大家等開入球大啦。

（有線64及203台周日下午2時直播）