美斯為肥約「蘇」哥利

猪拉多纳

西班牙盃4強次回合另一場賽事將於聽朝上演，由首回合領先2:0嘅巴塞作客皇家蘇斯達。雖然巴塞唔輸都出到線，但係球王美斯狀態已經返晒嚟，仲有份世界第一高薪合約等緊佢，對住近況低沉嘅皇蘇仲唔把握機會「騷哥利」？巴塞讓一球，1.85倍「讓球客勝」值得一試。

（now632台周四清晨5:00直播）
皇蘇前線啞火後防缺大將

皇蘇接連對巴塞同馬體會吞蛋後，上仗主場對利雲特持續頹勢，只能賽和對手0:0。最令人擔心係佢哋鋒線全面啞火，連續3場食白果。前線搞唔點，後防亦唔齊章，守將恩尼高馬天尼斯首回合領紅今仗要坐波監。難為賽前主帥阿拉沙迪仲叫班波畀心機爭入決賽，佢哋夠膽主動出擊只會對巴塞更有利。

巴塞上場作客反勝西維爾4:1，大大增強全隊信心，最重要係見到交出2入球1助攻嘅美斯狀態返晒嚟。連巴塞會長巴度美奧尋日喺記者會都承認會同美斯加薪續約，仲話要畀全球最高薪嚟配合美斯喺球壇地位。既然球會咁識做，美斯梗係要省多2粒喇，睇怕皇蘇今次都係凶多吉少。