祖記搶盃搵特拉布宗開刀

猪拉多纳

至於直播賽事，首推意甲祖雲達斯主場鬥土超球隊特拉布宗，祖記降格歐霸盃根本虎入羊群，雖然意甲球隊向來唔重視歐霸盃，但祖記今場有強烈復仇欲望，鬥志完全唔同，要炒起土耳其平庸球隊特拉布宗係簡單任務，讓球主勝可作過關重心。

（有線64及203台周五凌晨2時直播）
歐聯出局淪為笑柄

祖雲達斯擁有金鑽陣容，門將保方、守將基亞連尼、中場維達爾、派路，前線泰維斯同洛蘭迪都係歐洲頂級球星，於歐聯分組賽出局成為天大笑話，佢哋分組賽最後一戰作客加拉塔沙雷只要唔輸就出線，卻因為惡劣天氣將賽事斬開兩日踢，最終佢哋喺大風雪下遭加拉塔沙雷嘅荷蘭球星史奈達絕殺，全隊上下都視為奇恥大辱，今晚歐霸盃32強竟然巧合抽到同樣來自土耳其嘅特拉布宗，當然有更強戰意復仇，何況佢哋喺意甲已經拋離次席羅馬9分，有足夠條件分心爭歐霸冠軍。

特拉布宗喺土耳其只係平庸球隊，目前只排土超第9位，今季10場作客僅一勝，級數遠遜加拉塔沙雷，作客去到都靈注定做祖記點心。