愛斯賓奴回勇打爆艇

猪拉多纳

今晚賽事唔多，阿King睇中西甲獨腳戲愛斯賓奴主場火併維拉利爾，愛奴連贏兩場明顯回勇，相反「黃色潛水艇」上仗輸波又輸品，弗爆射手烏捷繼續倦勤，此消彼長之下，平手盤梗係捧愛奴喇。

（周二清晨5時開賽）

維拉利爾上仗主場迎戰切爾達，喺落後一球嗰陣，有「黃色潛水艇」粉絲唔忿氣，向切軍禁區掟催淚彈，令球場瀰漫煙霧及多人不適，比賽被迫暫停25分鐘，最終佢哋輸夠兩粒，不但打擊士氣，隨時有手尾跟。除此之外，「黃色潛水艇」主力查維亞阿基路、沙治奧阿辛祖、柏保路恩尼基斯及烏捷等統統傷晒，其中首席射手烏捷繼續缺陣，嚴重影響攻力。愛斯賓奴近期連贏兩場有復甦迹象，上仗更打破「山寨王」畢爾包聯賽主場不敗金身，連皇馬同巴塞都做唔到，依家氣勢如虹，主場迎戰頹爆嘅維拉利爾唔使讓波咁筍，梗係捧得過喇。
賓菲加拆「雷」保榜首

至於德乙科隆喺榜首遙遙領先，今仗主場對格雷特霍夫唔輸冇壞，讓半一未免太辣，但格雷特霍夫狀態亦麻麻，轉玩入球細好過。最後葡超一哥賓菲加主場七連勝，上周中歐霸作客亦擊敗希臘球隊PAOK，可謂勇達巔峰，為鞏固榜首位置，喺主場絕對唔會放過甘馬雷斯，直取讓球主勝。

（now 676周二凌晨4時15分直播）