熱拿亞教頭停賽任「里」劏

猪拉多纳

拿玻里今晚重返意甲戰場，會喺主場迎戰熱拿亞，佢哋喺上場歐霸盃32強首回合同史雲斯打和之餘，仲有門將拉菲爾卡比爾右膝重創收咧添！今晚返到主場，拿玻里誓要攞呢期表現大上大落嘅熱拿亞出氣，讓一球唔算多，一於捧1.72倍「讓主」！

（TVB301周二凌晨4:00直播）

拿玻里上場精銳盡出，但最終作客只能與史雲斯互交白卷，雖然近兩場都係正選嘅拉菲爾卡比爾仲要撕裂咗右膝十字韌帶，今季已經玩完，不過佢哋有連拿頂上，呢位西班牙門將日前就喺twitter祝福隊友早日康復，教練賓尼迪斯都公開感謝卡比爾今季嘅貢獻，可以話非常有人情味。
拿玻里前場齊番腳

最重要嘅係，先前被傳背部有傷嘅王牌射手希古恩，上場已經照常出賽，荷西卡利祖、佐真奴費路同恩拿又坐完波監，中前場人腳充裕，肯定撳住熱拿亞嚟砌！

熱拿亞今季作客前列球隊未贏過，中場古卡、守將維沙積高同甘巴連尼又養傷唔踢得，最慘係上場領紅嘅教練加斯柏連尼今日要服刑停賽，唔能夠喺場邊督師，似乎想偷雞都冇本錢喎！