恒大攻墨-1響頭炮

猪拉多纳

引入意國腳顯衞冕決心

亞洲王者FC廣州（廣州恒大）於亞冠盃分組賽被編入G組，衞冕第一擊主場對澳職墨爾本勝利，廣州今屆獎金縮水，但對比上屆陣容只有一個變動，由意大利邊緣國腳迪亞文迪取代阿根廷球星孔卡，喺亞洲賽事仍然超班，今戰打出「攻墨」口號，決心大勝響頭炮，熱捧讓球主勝！

（now 671周三晚8時直播）

FC廣州去季喺亞冠盃狂燒1.57億人仔獎金，成功以銀彈戰術稱霸亞冠盃，今屆會方調低獎金數字，每場贏波有300萬，和波100萬，輸波得個吉，晉級下輪就有300萬。不過，獎金減少並唔代表會方雄心不再，單睇佢哋力斟意國猛將迪亞文迪頂主將孔卡個位，就知幕後人落足本保住亞洲王者地位。
韓日交鋒細盤好路

廣州主帥納比強調若想衞冕就要更強爭勝決心，佢話球隊主場威力勁，有力大勝。會方賽前公布打氣海報，主題為「攻墨」，擺明會喪攻對手啦！隊內兩大進攻重心穆里奇及艾傑臣都可披甲，今場可夫添搏殺。墨爾本勝利外圍賽險勝泰國球隊蒙通聯踢得麻麻，主帥梅斯卡特講明志在參與，遇上廣州恐怕冇運行。

同組另一場直播賽事韓職名牌全北汽車主場對日職勁旅橫濱水手，全北名帥崔康熙進行大換血，一口氣引入十個新兵，變動太大需時間磨合。至於水手放走王牌射手馬昆奴斯後仲未搵到理想替補人選，上場日超盃睇得出班波冇乜進攻板斧，今戰玩細盤最好！

（now 671周三晚6時直播）