師徒對決寸王揸車撞散加拉

猪拉多纳

今晚歐聯16強首回合爆發「師徒對決」，由加拉塔沙雷主場迎戰車路士。効力加拉嘅杜奧巴同史奈達，都係莫連奴舊部，當中杜奧巴更係倒戈鍊車。「張峰」相信既然莫帥可以將佢兩個發揮得淋漓盡致，亦會知點去防範兩位愛將，一於撐「寸王」率領嘅「藍戰士」先拔頭籌，捧1.82倍客勝。

（有線61、201周四凌晨3:45直播）
二線加拉兩鬥皇馬慘敗

加拉塔沙雷喺分組賽最後一仗，憑史奈達臨完場一箭定江山搞掂祖雲達斯，反壓對手以次名躋身16強。查實呢支土超勁旅除咗「魔獸」杜奧巴同史奈達之外，亦有唔少喺歐洲大球會打滾過嘅球員，好似右閘伊保爾、中場咸美艾天托普同左翼尼亞拿等等，人腳確係唔錯。不過始終土超喺歐洲只屬二線水準，去到歐聯呢啲大舞台對強隊難免較輸蝕，睇番佢哋分組賽兩鬥皇馬，結果加埋失咗10粒，就知有差距啦！

今季莫連奴重掌車路士，經過半季調校，表現愈嚟愈好，暫時喺英超位居榜首。上周聯賽主場對愛華頓，對方門將侯活完場前犯下致命失誤，帶挈車路士小勝一粒，睇落驚險，但唔好忘記，「拖肥糖」不嬲韌力十足，贏得辛苦係可以預期。
夏薩特 伊雲洛域夠煞食

若然要數車路士陣中表現突出球員，當然首推翼鋒夏薩特，呢位比利時國腳潛質優厚兼且變速快，喺左路推埋大位射門冇錯人人都睇穿，但擋得住呢招必殺技又有幾多個吖？仲有右閘伊雲洛域亦演出穩健，出波夠靚之餘仲間唔中有士哥，今晚隨時係一路奇兵，問你加拉塔沙雷嘜得邊個！
Data King 車仔盃賽6連細

‧加拉連續16場主場不敗。

‧車路士連續6場盃賽開細。

‧加拉主場8戰英格蘭球隊，取得3勝3和2負。