恒大砌車直取主W

猪拉多纳

「鑽石」光芒四射耀廣州

今晚亞冠分組賽G組第3輪，衞冕嘅廣州恒大（足智彩譯FC廣州）主場迎戰南韓勁旅全北汽車，綽號「鑽石」嘅新援迪亞文迪今季已為恒大攻入咗4粒，咁蹺都係喺禁區前右側嘅「帝位」製造士哥，級數超晒班，上仗恒大大意失分，畀主帥納比省到立立令，今仗實搵全北汽車出氣，主勝有買趁早。

（now 671周二晚8時直播）
迪亞文迪亞洲超班

意大利新援迪亞文迪加盟恒大冇耐就極速融入，至今已經有4球進帳，由於呢位左腳王喜歡喺右路搵食，如入無人之境，因此無論係個人突破、窩利抽射抑或施展罰球妙技，佢嗰4個入波全部都係禁區前右側製造。

廣州恒大官方更用「帝位」嚟形容呢個食胡位，絕對唔講得笑。恒大上仗亞冠盃作客僅能逼和日本代表橫濱水手，賽後主帥納比發晒火，鬧爆球員唔夠團結及爭勝飢渴感，呢班大帝知恥近乎勇，今仗一定做番齣好戲畀納比睇。

當然全北汽車亦非善男信女，依家與恒大同得4分，憑較佳得失球暫列榜首，特別係隊長兼射手李東國依然好弗，只係佢哋後防甩漏多，上仗連實力稍遜嘅澳職墨爾本勝利都省到佢哋兩粒，今仗面對喺亞洲明顯超晒班嘅迪亞文迪點頂得住先？
全北汽車人丁單薄

據報全北汽車今次只係帶咗16名球員出征廣州，人丁咁單薄唔似係搏殺格，況且恒大除「鑽石」外，艾傑臣、黃博文、郜林等近況亦佳，該隊今季射入嘅12球分別由7名球員取得，可見攻擊點分布好廣，全北汽車真係唔知嘜得邊個，建議簡單啲直取主W。