伊圖諾「士」氣爆燈撐「讓主」

猪拉多纳

巴西聖保羅省聯賽終於進入決賽階段，伊圖諾於晉級過程中先後K.O.保地花高SP同彭美拉斯，爆大冷殺入王者爭霸戰，家陣成班波嘅信心同士氣都好到爆晒燈，就算面對「一哥」山度士，亦有力一戰！首回合伊圖諾中立場出擊受讓1球，2.35倍嘅「讓主」抵博！

（開賽時間：周一凌晨3:00）
山度士賴完嘢唔敢再喪攻

伊圖諾鋒力唔算強，喺15場巴省聯賽事中入得16球，但呢班波勝在防線勁穩，整季巴省聯僅失10球，係失波最少嗰隊！若然佢哋唔係喺3月初倒灶輸畀商業足球會，早就已經可以小組首名出線，避開晒啲勁旅。不過，塞翁失馬，焉知非福，伊圖諾先喺8強對住勁旅保地花高SP，4強又硬撼老牌班霸彭美拉斯，但佢哋一樣交足貨力保不失，強勢殺入決賽，證明呢班波實力並唔簡單。

係，對家山度士鋒力確係一流，但進入淘汰賽階段後，佢哋似乎略有疲態，4強對住彭拿保蘭斯更兩度落後，最後完場前絕殺先勉強晉到級，吸收過教訓，相信今次決賽首回合，山度士去到人哋地頭未必敢再立亂喪攻，伊圖諾難得受讓，「讓主」絕對玩得過！