拉素爭踢歐霸唔衰得 「客」走拿玻里

猪拉多纳

拿玻里季初係威係勢，但踏入2014年之後就猛咁失分，前鋒希古恩陷入球荒不特止，最近仲同教練賓尼迪斯鬧不和添，今晚對住矢志爭奪來屆歐霸盃入場券嘅拉素，就算有地利都信唔過，「讓球客勝」有2.42倍梗係值博啦！

（TVB301周日晚9:00直播）
賓尼迪斯扯白旗

贏完祖雲達斯轉頭輸畀帕爾馬，失望嘅唔單止球迷，就連教練賓尼迪斯都扯晒白旗，上場輸完波之後向傳媒話：「亞軍肯定係羅馬，我哋冇嘢好爭！」連掌舵人都咁講，試問班手足仲點會搏命吖？最濕滯係希古恩已經連續4場聯賽冇波入，上仗鬥帕爾馬踢到68分鐘被調離場時，「小煙槍」仲同「賓佬」吵咗鑊添，睇得出陣營士氣真係麻麻。

反觀今仗對手拉素就狀態冒升，最近連贏帕爾馬同森多利亞，係3個月以嚟首次喺聯賽連捷，教練列查話為咗爭奪來屆歐霸盃入場券會拚到最後一刻，鬥心絕對唔使懷疑。中場碧基亞今晚要坐波監，列迪斯馬要攞番正選嘅話，今晚做「替工」肯定會加多兩錢肉緊，加上簡達華今季重生，目前已經貢獻9球及5次助攻，球員又Fit、鬥心又好，夠晒本錢同拿玻里鍊。