曼城盡情發洩追紅軍

猪拉多纳

新特蘭護級腳軟主帥投降

曼城上場喺英超冠軍前哨戰作客不敵利物浦，爭標形勢由主動變被動，大將耶耶托尼更有可能提早收咧，不過受傷嘅獅子永遠最可怕，曼城今場返到主場對「黑貓」新特蘭仲唔力求贏波反彈，保住爭標機會咩。今場佢哋讓對手兩球都冇有怕，捧讓球主勝！

（now 621周四凌晨2時45分直播）

曼城上場一開波畀利物浦壓住嚟打，陣腳大亂，踢到上半場中段仲要有耶耶托尼傷出，結果半場輸緊兩粒，不過「藍月亮」又點會咁輕易畀對手打冧，下半場大衞施華變番大魔術「施」，頻頻同拿斯尼互傳玩到紅軍後防陀陀擰，後備奇兵占士米拿就喺右路發難，用咗大約5分鐘時間就成功追和，最後輸波只可以話唔夠運。
普耶發晦氣暗示跳船

不過呢場波見到曼城認真起上嚟連利物浦都頂唔住，試問包尾嘅新特蘭又點頂呀？今場曼城眾將實會將怒氣發洩喺新特蘭身上，務求大炒一場繼續向紅軍施壓。

嚟到護級最後直路，新特蘭明顯腳仔軟，近八場聯賽輸足七場，成隊波冇晒鬥志，領隊普耶唔單止未能激勵球隊士氣，反而公開向傳媒講晦氣說話，話如果「黑貓」降班唔應該怪責佢，因為球隊開季開得太差，又話球會買人方針好有問題，近日更暗示球隊內部腐爛，所以自己唔排除季尾會自動走人。嘩，喺呢個關鍵時刻，身為主帥咁講嘢都得嘅？班球員仲點會幫你搏命呀？一於揀曼城讓球主勝啦！