史隆卡查漢奴古救漢堡

猪拉多纳

德甲尾場漢堡主場迎戰禾夫斯堡，排尾三嘅漢堡餘下四輪賽事都係生死戰，今晚球隊傷兵滿營，面對正力爭下屆歐聯席位嘅禾堡當然唔易踢，不過Oliver相信有兩個人可以救命，佢哋就係新帥史隆卡同新星查漢奴古。
史隆卡剋死禾堡教練赫基

漢堡搵史隆卡救命係明智抉擇，不過Oliver認為漢堡應該請多個教練同佢合作，因為佢將過往喺漢諾威嘅「恐客症」帶埋嚟漢堡，至今踢咗4場作客賽事輸晒，作客波應該由第二位教練代佢領軍，不過今場係主場，喺史隆卡帶領下，漢堡主場3勝2和未輸過。值得一提嘅，係史隆卡同禾夫斯堡教練赫基多年來係鄰居同最好嘅朋友，兩人無所不談，戰術方面互相瞭如指掌，不過史隆卡喺球場上一直係赫基嘅剋星，近6次對賽史隆卡取得全勝，無論赫基執教亞琛、紐倫堡、漢諾威或禾堡，一對住史隆卡就束手無策。

漢堡今仗傷兵多，連領袖雲達華治都因傷缺陣，不過擁有當今德甲最炙手可熱新星查漢奴古，佢嘅超級射門今季屢建奇功，漢堡上仗作客1比2輸畀漢諾威，對手就用盡一切辦法阻止呢位小將射門，但全場佢只射一腳罰球就入世界波，Oliver相信查漢奴古今晚將會成為救星。漢堡主場受讓平半，我博下盤。
Oliver 推介：

拜仁慕尼黑讓球勝：３★

弗賴堡細：３★

漢堡下盤：４★

（有線61及64台周日凌晨零時30分直播）