|
今輪西甲上演巴倫西亞市打吡,利雲特主場對華倫西亞,兩隊一向勢成水火,利雲特希望爬過死敵頭過終站,主場出擊一定搏甩髀,讓球主勝值得捧場。
(周日凌晨4時開賽)
華倫大批主力有傷
以往「大蝙蝠」華倫係同市大佬,特別係賓尼迪斯年代捧盃捧到手軟,但球隊不斷賣星下戰績一年差過一年,相反「小蝙蝠」利雲特貫徹低買高賣作風,經常發掘有料到嘅平價兵,但始終只係巴倫西亞市阿二。不過今季情況有啲唔同,儘管雙方都肯定冇得爭來屆嘅歐洲賽資格,現時排第八嘅華倫只係比利雲特多一分,聯賽剩番兩輪,撞正華倫有桑班列特、辛德路斯、域陀雷斯及費侯利等主力因傷上陣成疑,「小蝙蝠」今仗只要贏波,就隨時爬過死敵頭完成球季,過下巴倫西亞一哥癮,佢哋有地利之餘兼有得受讓,梗係揀讓球主勝喇。 |
|